युग जागरण न्यूज़ नेटवर्क
रद्दा म मिलगे भुरू,
कथे महू ल बनना हे जगतगुरु,
मोला कहिस के खरचा पानी देहंव बेटा
चल काम कर शुरू,
सोचे लगेंव के एहा पी खा के आय हे,
धन कोनो चना के रुख म चढ़ाय हे,
एला कोन हुचहुचवाय हे,
के अपने अपन बउराय हे,
मोर मुंह होगे तुरुरुरु,
कइसे बनाव एला जगतगुरु,
कहेंव दाढ़ी बढ़ाय ल लगही,
कुछु चमत्कार देखाय ल लगही,
मंतरा मारे कस बड़बड़ाय ल लगही,
कोनो एकेच रंग के ओनहा पहिर के
जमो लोगन के बीच म आय ल लगही,
कथे नई करां,
कुछु सवांगा नई धरां,
त फेर चल तपसिया कर,
कोनो पहाड़ म जाय के उदिम कर,
नई जाय के मन होही
त चार महीना घरे म खुसर,
कथे अइसनहा म अकबका जाहूं,
घरखुसरा बन असकटा जाहूं,
मैं कहेंव,कका तब तो तोला मय
जगतगुरु नई बना सकंव,
जादा पुन नई कमा सकंव,
मोला परसान देख आइस झुरु,
कहिस मैं तोला बनाहंव जगतगुरु,
तैं का का करम कुकरम नई करेहच,
झगरा लड़ाई कर करके
सबो ल हलकान करे हस,
त ले जल्दी सीख,
अउ अपन नाम के आघु म जगतगुरु लिख,
धीरे धीरे सबो तोला कहे लागहिं जगतगुरु,
पोठ चीज बस कमाबे
नई रह जास सिरिफ भुरू।
राजेन्द्र लाहिरी पामगढ़ छग
