युग जागरण न्यूज़ नेटवर्क
मैंय तोर सेउक औंव दाई, तैंय मोर महतारी ओ।
कमल फूल म बिराजे अउ शेर ह तोर सवारी ओ।।
गदा, संख, चकरा, सतदल धरे हच चारों हाथ म।
तोर पूजा करे ले, सबो देवी के सेवा होथे साथ म।।
तोर किरपा बरसे ले, कोनों कारज नइ रहय अधूरा।
तप करे ले लोक अउ परलोक के इकछा होथे पूरा।।
दया करके जइसे भोलेनाथ ल दे जम्मों सफलता।
अर्धनारीश्वर नाव ले मिलिच भवसागर म परतिष्ठा।।
चरन म माथा नवाए हौंव, जिनगी म मंगल करदे।
सुख, सांति, आनंद के अमरीत पद ल मोला देदे।।
अछप, परताप, रुप धरे के, मनचाहे देबे परसिद्धी।
कामना, परभुता, बसीकरन, परन के आठों सिद्धि।।
कवि- अशोक कुमार यादव मुंगेली, छत्तीसगढ़
जिलाध्यक्ष राष्ट्रीय कवि संगम इकाई।
